Nadismaya ang convenor sang 1SamBayan kasunod sang ginpatawag nga joint press conference nanday presidential candidates Manila Mayor Isko Moreno Domagoso, Senator Panfilo Lacson, Senator Manny Pacquiao kag anay national defense secretary Norberto Gonzales.
Suno kay anay Negros Occidental Governor Rafael Coscolluela, nadisappoint ini sa ginhimo sang apat bangud kaangay nga nagpatawag lang ang mga ini sang joint press conference para sa pag-anunsyar sang unified ticket agud makahatag sang 3rd option sa mga botante.
Ginalantaw man ni Coscolluela nga kaangay lamang nga nagpakitluoy ang apat ka presidential candidates, kag ang malain pa bangud ginpunterya sang mga ini si Vice President Leni Robredo nga indi man makapanagang.
Apang ginpahayag man sini nga ang ginhimo sang apat ang nagduso sa mga Pro Leni nga magpangampanya pa dugang para sa presidential bid sang Bise Presidente.
Ginpahayag man sini nga ginpatiyog-tiyog man ni Gonzales ang iya nga pahayag bangud ginapagwa sini nga indi matuod ang survey, apang survey man ang ginabasehan sang iya pahayag.
Ginalantaw man sini nga bentaha ang ginhimo sang apat para kay Robredo bangud mahimo nga madamo ang magalas-ay nga mga botante sa apat.
Ginpahayag man sini nga ang ginhimo ni Gonzales ang isa lamang ka publicity stunt agud nga makakuha sang atensyon nagikan sa publiko.
Suno kay Coscolluela, sa karun ginadihon na sang mga ini ang house to house campaign kag gindeploy ang tanan nga youth volunteers bangud santo sa survey, may yara pa sang 15 tubtob 20 porsyento nga undecided.
Suno diri, luyag na lamang nila nga palaptahon ang kamatuoran kag ang mga pumuluyo na ang bahala nga magdesisyon sang ila nga pagabotohon sa adlaw sang eleksyon sa Mayo 9.
