Nagalaom ang convenor sang 1SamBayan nga magaabot ang adlaw nga wala sang kandidato sa pagkapresidente nga magaabsent sa candidates forum ukon debate.
Nahibaluan nga wala nagtambong si anay senador Bongbong Marcos sa debate nga ginpatigayon sang Kapisanan ng mga Brodkaster ng Pilipinas kahapon apang nagpakita ini sang abilidad sa pagluto kaupod ang TV host nga si Korina Sanchez.
Sa interview sang Bombo Radyo kay former Negros Occidental Governor Rafael ‘Lito’ Coscolluela, kanugon nga may nag-absent nga kandidato sa forum.
Suno kay Coscolluela, ang forum ang kahigayunan agud makilala sang mga botante ang kandidato, lakip na ang iya abilidad, hinimuan kag plano para sa pungsod kag wala sang pierde ukon daog diri bangud indi ini debate.
Bangud importante ini nga bahin sang eleksyon suno sa anay gobernador, mas maayo gid yara ang tanan nga kandidato agud nga sila ang mabatian kag makilala sang mga pumuluyo.
Bisan indi debate ang forum suno kay Coscolluela, oportunidad naman ini agud mapakilala sang kandidato ang iya nga kaugalingon.
Ini ang kaangay na gid lamang sang pag-apply sa trabaho kun sa diin indi lang documentary requirements ang ginapresentar kundi may yara sang face-to-face interview agud nga matakos ang kapasidad sang tawo.
Aminado naman si Coscolluela nga mabudlay pa ang mga requirements para sa nagaapply sa trabaho sangsa pagkapresidente bangud nakabutang sa Konstitusyon nga ang Pilipino nga nagaedad sang 40-anyos pasaka kag makahibalo magbasa kag magsulat ang sarang na makapadalagan bilang presidente apang wala man sang gintalana nga educational attainment.
