Para sa convenor sang Amlig Tubig, indi ini pabor sa pagpasulod sa bag-o nga water concessionaire sa ciudad sang Bacolod bangod sa ginaluaman nga mahal nga presyo kag indi maayo nga serbisyo.
Sa interview sang Bombo Radyo kay former councilor Wilson Jun Gamboa, kun may yara sang ginbayolar sa kontrata ang isa ka partido, masami nga ginahimo diri amo ang pagterminate sang iya kontrata.
Suno diri, nakita na sini humalin pa sadto ang problema sa tubig, amo nga hugot ang pagpamatok sini sa Joint Venture Agreement sang Bacolod City Water District (BACIWA) kag Prime Water.
Dugang pa sini, sa kontrata pa lang mismo, klaro na nga pabor lamang ang JVA sa mga kapitalista kag indi sa konsumedor.
Amo nga nagpanawagan ini nga dapat ang may kontrol diri amo ang management kag konsumedor kag indi ang pribado nga sektor bangod nga kun ini hilabtan sang private sector, suno kay Gamboa, ang gwa sini amo nga indi serbisyo kundi negosyo kag kun negosyo ang lakat, ang serbisyo apektado.
Sa karun sa ginalantaw sang miyembro sang Sangguniang Panlungsod sa ciudad sang Bacolod nga mangin solusyon sa problema sa supply sang tubig ang pagpasulod sang bag-o nga water concessionaire, pamangkot ni Gamboa, kun ini bala batunon lang sang gilayon bisan indi man ini makahatag sang insakto nga serbsiyo bangod man nga madamo sang nagareklamo batok diri sa mahal nga presyo kag indi maayo nga serbisyo.
