Dako ang pagpati sang convenor sang Power Watch-Negros nga isa ka dako nga development para sa mga konsumedor kun mahatag na ang franchise sang Negros Electric and Power Corporation (NEPC).
Sa interview sang Bombo Radyo Bacolod kay Wennie Sancho, kun yara na ang franchise, matrabaho na sang NEPC ang kaundan sang Joint Venture Agreement sang Central Negros Electric Cooperative kag PrimElectric.
Suno diri, sa karun nagsaka pa sa masobra sa 1 million ang ginaserbisyohan sang CENECO sa tanan sini nga franchise sa probinsya sang Negros Occidental, amo nga dapat lamang nga pasakaan man ang supply sang kuryente.
Nagapati si Sancho, nga sa pagtake -over sang NEPC ang makapa-enhance sang power supply kag maimprubar ang distribution kag generation capacity sang kuryente kadungan man sa pag-improve sang grid lines.
Dugang pa sini, ginalantaw niya nga posible nga magamay na lamang nga brownout kag power interruptions ang mabatyagan sa idalum sang NEPC.
Samtang, nagapati naman ini nga mangin prayoridad sang NEPC ang bill deposit kag meter deposit kasubong man ang rehabilitation sang imprastraktura sa tion nga mapasar ang House Bill 9805 ukon ang hagna nga nagaduso sa paghatag sang prangkisa sa Negros Electric and Power Corporation.
