Nagpanindugan ang Convenor sang Power Watch Negros nga wala sang iban pa nga tinutuyo ang Joint Venture Agreement sa tunga sang CENECO kag Ignite More Power Corporation kundi nga mahatagan sang benepisyo kag bintaha ang mga konsumedor sang CENECO.
Sa interview sang Bombo Radyo kay Wennie Sancho, nagpadala ang Power Watch sang sulat kay Councilor Claudio Jesus Raymundo “Kalaw” A. Puentevella, chairman sang Committee on Energy, bilang pagpabalo sang ila suporta sa JVA kasubong man nga wala sila sang problema nga makigbahin sa Public Hearing agud mahatagan sang madalom nga pagpaintindi ang mga konsumedor.
Luyag sini nga mahibaluan sang mga konsumedor ang kamayuhan nga dala sang JVA, gani nagsugod na ini sang pagpanagtag sang mga impormasyon para mas maintindihan sang publiko ang lakat sang paghugpong sang CENECO kag Ignite More Power Corporation.
Gusto sini ipadangat nga maka-ingganyo sa mga investors ang maayo nga lakat sang kuryente kasubong man nga mapasaka ang opportunidad sa trabaho kag pagpasanyog sang ekonomiya.
Suno kay Sancho, ang pagpati sang mga konsumedor nga magsaka pa gid ang ila balayran sa kuryente kun na-privatize na ang CENECO, apang gin-athag sini nga indi 100 porsyento nga naka-public ang CENECO bangod nga ini may ginabayaran sa Social Security System, Philippine Health Insurance Corporation kag Value Added Tax.
Apang, nagpasalig ini sa mga konsumedor nga sa katapusan sang tanan, ang prebilihyo ang igahatag sa ila.
