Ginpahayag sang convenor sang Water Watch Negros nga indi lang dapat pag-reviewhon kundi dapat kanselahon na ang kontrata sang Bacolod City Water District (BACIWA) kag Prime Water Inc.
Sa interview sang Bombo Radyo Bacolod kay Wennie Sancho, welcome development para sa Water Watch Negros ang patigayunon nga pagreview sang kontrata.
Suno kay Sancho, sang January 28, 2019 may ginpadala na sila nga sulat kay Atty. Lorendo Dilag agud pamatukan ang Joint Venture Agreement sa Bacolod City Water District (BACIWA) kag Prime Water Inc., nagsabat man ang natungdan apang wala ginpamatian ang ila panawagan.
Bangud sa JVA sang duha ka water concessionaires, nagtuga ini sang pag-agunto sang mga konsumidor bangud sa indi maayo nga serbisyo.
Dapat ibalik sa Baciwa ang management sa pagsupply sang tubig sa ciudad kag kun liwat nga magpatigayon sang JVA dapat may public hearing agud makahibalo ang kunsumidor kag dapat may bidding.
Nagakadapat man nga sukton ang Board of Directors sangBacolod City Water District (BACIWA) kag Prime Water Inc. sa huol nga ginhatag sa kunsumidor.
