Ginbawian sang kabuhi ang isa ka cook matapos ginbuno sa circumferential road sa bahin sang Brgy Taculing, Bacolod City, kasunod sang komosyon sa ilimnan pasado alas-3:00 kaina sang kaagahon.
Sa interview sang Bombo Radyo Bacolod kay Police Captain Glen Montaño, station commander sang Bacolod Police Station 6, magkaupod nga nag-inom sa bar ang biktima nga ginkilala nga si Alyas Edmar, residente sa banwa sang Hinigaran, cook sang isa ka kalan-an kag ang katrabaho sini nga dishwasher, sang may nagluntad nga komosyon sa gwa sang ilimnan.
Gina-alegar nga gikan sa isa ka convenience store ang grupo sang mga pamatan-on nga ginalantaw yara sa 20s ang edad nga ginalakipan sang anom ka lalaki kag duha ka babayi.
Nagbaisay ang mga ini tubtob nga may nagluntad na sa pisikal nga away, gani sila ang ginsaway na ni Edmar.
Apang ginapahayag nga sang wala sang may nagpamati sa pagsaway sini, ginhaboy sang biktima sang pulungkuan ang mga nagakamog kag naigo sini ang suspect.
Gilayon ini nga ginbalikid sang suspect kag ginbuno sa liog.
Matapos ang pagpamuno, napuhag gilayon ang grupo sang mga pamatan-on kag nagpinalagyo, samtang ang biktima ang nahimo pa makadalagan sang kapin 50 ka metros antes natumba.
May nagreport naman sa kapulisan, kag sa ila pagresponder gilayon nila ginkarga sa patrol car ang biktima kag gindala sa Bacolod Adventist Medical Center agud mabulong.
Apang bangod sa patal nga pilas sa liog, siya ang ginbawian sang kabuhi pasado alas-4:00 sang kaagahon.
Tsekyaron man nila ang CCTV footage sa convenience store agud matumod ang identity sang suspect.
Samtang, alas-2:00 subong nga hapon, nadakpan na ang 18-anyos nga suspect sa hot pursuit operation sang kapulisan.
Ini ang ginkilala nga si alyas “Kiki”.
Padayon pa ang imbestigayon sang mga kapulisan sa pagtumod kun may involvement man ang kaupdanan sang suspect sa nasambit nga insidente.
