Positibo ang paglantaw sang Philippine Drug Enforcement Agency (PDEA) Negros Occidental sa ginhuman nga Joint Memorandum Circular sa tunga sang Philippine National Police (PNP) kag PDEA.
Nahibaluan nga ginpirmahan na nanday PNP Chief General Guillermo Eleazar kag PDEA Director General Wilkins Villanueva ang coordinated guidelines sa duha ka ahensya may kaangtanan sa mga illegal drugs operations.
Suno kay PDEA Negros Occidental Head Nicholas Gomez, ang joint memorandum circular ang may katuyuan nga mapabaskog pa ang relasyon, koordinasyon kag kooperasyon sa tunga sang PNP kag PDEA ilabi na sa bahin sang mga operasyon batok sa iligal nga droga.
Ginalauman na sini nga mapanaog sa ila ang kopya sang derektiba sa masunod nga semana.
Dugang pa ni Gomez nga tinutuyo man sang paghuman sang guidelines amo nga malikawan ang kaangay nga insidente nga nagluntad sa Luzon kun sa diin nagka misencounter sa tunga sang duha ka grupo.
Paathag ni Gomez nga kinahanglan ang koordinasyon.
Aminado naman ini nga may orihinal na nga guidelines natuhoy sa pagcoordinate sang PDEA sa kapulisan kun may gina-operar sa nasakupan sang mga ini, apang dapat naman ini nga mas mapasanyog pa agud nga makalikaw sa misencounter.
Paathag sini nga importante nga may klaro nga guide sa pagpatigayon sang mga anti-illegal drugs operations.
Samtang ginpakigbahin man ni Gomez nga may unified watchlist ang PNP kag PDEA gani indi malikawan nga mangin magkaangay ang ila nga target sang operasyon sa parehas nga adlaw.
Suno kay Gomez, diri sa Negros Occidental, kun matukiban nila nga magkaangay ang target nila sa iya ka PNP, gina-estoryahan na lang sang mga ini kun sin-o ang maga-operar ukon hemuon ini pinaagi sa joint operation.
Masami naman nga ginapatigayon sang PDEA Negros Occidental ang joint operation upod sa mga kapulisan.
Nagapati si Gomez nga ang ginpirmahan nga guidelines ang makahatag sang dugang nga paathag sang ila dapat nga hemuon.
