Naghatag na sang rekomendasyon ang coordinator sang City Anti-Drug Abuse Council sang Bacolod kun ano ang dapat nga himuon sa mga job order casuals kag regular employees nga nagpositibo sa illegal drug use kasunod sang random drug test.
July 29 nagsugod ang random drug test sa casual kag regular employees sang city government.
Suno kay Police Brigadier General Primitivo Tabujara, head sang Public Order and Safety Office, kag coordinator sang City Anti-Drug Abuse Council (CADAC), gin-una ang 11 ka staff nga naga-manage sa Balay Silangan sang Hulyo 29 kag lunsay negatibo ang resulta.
Ini ang ginsundan sang drug test sa mga personnel sang Bacolod Traffic Authority Office sang Hulyo 30.
Nagikan sa kabug-usan nga 282 ka traffic enforcers nga nagsumiter sang urine sample, 32 diri ang nagpositibo ukon 11.35 percent kun sa diin apat diri ang regular employees.
Sunod diri ang mga personnel sang Public Order and Safety Office kun sa diin nagikan sa 381 personnel, 21 ang nagpositibo sa illegal drug use ukon 5.51 percent.
Sa kabug-usan nga 705 employees, 53 ang nagpositibo lakip na ang apat ka regular employees nga assigned sa BTAO.
Bangud subject for confirmation pa ang resulta, ginrekomendar ni Tabujara kay Mayor Alfredo Benitez nga interviewhon ang nagpositibo kun sila ang handa nga magpaidalom sa drug rehabilitation program sang city government.
Sa Agusto 10, iga-aassess ang severity sang addiction sang mga natungdan bangud nakadepende diri ang kalawigon sang ila nga rehabilitation.
Ang makapasar naman sa drug rehabilitation program ang makaangkon sang tsansa nga marehire apang ang malagbong ang materminate.
