Nagpangayo sang pasaylo ang medical center chief sang Corazon Locsin Montelibano Memorial Regional Hospital sa mga pumuluyo kag komunidad nga indi mahatag sang ospital ang bilog nga serbisyo sini bangud sa pagpositibo sang pila ka mga doktor kag staff sa COVID-19.
Madumduman nga ginkumpirmar ni Dr. Julius Drilon nga 29 na ang kabug-usan nga numero sang mga empleyado sang CLMMRH nga nagpositibo sa COVID-19 matapos madugangan sang 14 ka mga kaso tinalikdan nga adlaw.
Sa 29, walo diri ang mga doctor, apat ang nurse kag 17 ang admin support staff.
Bangud diri, ginpaiway anay ang pagbukas liwat sang out patient department (OPD), subong man man ang pagbaton sang mga suspected nga covid positive patients.
Sirado man ang department of obstetrics and gynecology department kag neonatal intenstive care unit sang regional hospital.
Sa interview sang Bombo Radyo kay Drilon, nagapangayo ini sang pasaylo sa mga kliyente, pumuluyo kag komunidad kun indi makahatag sang bilog nga serbisyo ang ospital bangud nagahalong lng sil nga indi na maglapta pa ang virus.
Apisar sang sitwasyon, nagapasalig man ini nga kontrolado nila gihapon ang sitwasyon.
Aminado ang medical center chief nga makahatag sang kahangawa ang numero sang mga nagpositibo apang suno diri, kontrolado sang management ang sitwasyon kag ila man ginaubra ang tanan nga masarangan agud mapunggan ang paglapta sini.
Nag-abiso man si Drilon sa mga pumuluyo nga may ginabatyag sa laawas nga magkadto anay sa iban nga mga health institutions.
Nagalaom man ini nga makabalik na sa normal nga operasyon ang ospital makaligad ang isa ka semana.
