Ginkondenar ni Cotabato City Mayor Bruce Matabalao ang pag-ambush sa convoy ni BARMM Chief Minister Abdulraof Macacua sa Datu Odin Sinsuat, Maguindanao del Norte.
Kasunod sini, nanawagan si Matabalao sang madasig, patas, kag transparent nga imbestigasyon agud matumod kag mapasabat ang mga responsable sa ambush.
Gin-engganyo man sang alkalde ang publiko nga magpabilin nga kalmado kag likawan ang pagpalapta sang sala nga impormasyon samtang ginahibalo pa ang bug-os nga natabo.
Madumduman nga gin-ambush si Bangsamoro Autonomous Region in Muslim Mindanao (BARMM) Interim Chief Minister Abdulraof “Sammy Gambar” Macacua kag ang convoy sini sa Barangay Dulangan, Datu Odin Sinsuat, alas-4:45 kahapon sang hapon.
Maswerte nga wala sila napilasan matapos maigo ang tatlo nila ka mga salakyan.
Nagabyahe si Macacua halin sa iya lugar sa Barangay Gambar, Mother Kabunlan, kun sa diin nagtambong ini sang proclamation rally sang Bangsamoro Federalist Party (BFP), ang partido nga iya gin-updan sang damlag lang kag ginhingadlan siya nga chairman matapos magpadalagan bilang independent candidate sa 3rd district sang probinsya.
Kasunod sini, ginhugtan ang seguridad sa sulod sang Bangsamoro Government Center samtang padayon ang follow-up operations kag imbestigasyon sa insidente.
