Indi kumpormi si Bacolod City Councilor Al Victor Espino sa pagpatuman sang gun ban sa Masskara Festival 2026.
Nahibaluan nga nagrequest ang Bacolod City Police Office sang implementasyon sang gun ban kag signal jamming sa pagselebrar sang kapiestahan.
Sa interview sang Bombo Radyo Bacolod kay Espino, ang rasun kun ngaa indi sini luyag nga magpatuman sang gun ban ang bangod ini ang nagahatag lamang sang limitasyon sa mga legal gun owners.
Pahanumdom sini nga ang implementasyon ang wala man sang epekto sa mga nagahupot sang indi lisensyado nga armas.
Suno sa konsehal, dapat ang mas hugton amo ang adlaw-adlaw nga operasyon batok sa mga illegal gun owners.
Panindugan niya nga nagawad ang mga may lisensyado nga armnas sang ‘license to possess firearms outside residence’ bangod sa nanarisari nga rasun, kalakip na ang pamahog sa kabuhi.
Gani indi sini mahangpan ang rasun sa pagdeklarar sang gun ban.
Dugang pa niya nga may rules man nga ginlatag sa pagkuha sang lisensya, nga indi nila pwede nga dal-on sa mga festival sites ang mga armas luthang.
Sa pihak nga bahin, wala naman ini sang problema sa pagpatuman sang signal jamming.
Aminado si Espino nga makatuga sang kabudlayan sa mga sibilyan, partikular na sa komunikasyon ang signal jamming.
Paathag niya nga ginagamit ang signal jamming bilang interference sa mga mahimo magamit sang cellphone ukon iban pa nga gadget bilang trigger sa mga explosives.
