Hugot nga nagpanindugan si Bacolod City Councilor Al Victor Espino nga indi loan ang P2.1 billion nga Public-Private Partnership (PPP) agreement kaupod ang High Data Infrastructure Corporation para sa napulo katuig nga Build Transfer Maintain.
Sa interview sang Bombo Radyo Bacolod kay Espino, nag-init ang diskusyon matapos nga nahinambit ang loan.
Suno sa konsehal wala sang natabo nga loan kag ang nasambit nga tinaga ang wala naghalin sa iya kundi sa proponent nga si Councilor Wilson Jun Gamboa.
Pahayag ni Espino, ang High Data Infra Inc amo ang partner sang City Government sa digitalization sang functions sang gobyerno kaangay sang security, real property tax assessment kag madamo pa nga bagay nga makabulig agud mangin Super City ang Bacolod City.
Suno sa konsehal, sa iya pagpati nga ang ciudad sang Bacolod ang indi na kinahanglan pa nga magpasaka sang buwis, ang kinahanglan himuon amo ang paghimo sang tikang sa efficient tax collection agud nga maka-generate sang pondo para sa operasyon sang ciudad kag madamo pa.
Pahayag ni Espino nga wala sang kamatuoran ang pahayag ni Gamboa nga may loan ang ciudad, bangud ang P2.1 billion nga nakasaad sa kontrata sa idalom sang Public Private Partnership ang indi loan.
Suno diri, may yara dapat sang accomplishment nga ipresentar ang High Data Infra Inc. sa ciudad agud sila ang mabayaran.
Dugang pa sa konsehal nga may mga insinuation pa si Gamboa nga may napagwa na nga kwarta rason nga ginpangayuan niya ini sang pamatuod.
Ginbawi man ni Gamboa ang statement sini nga suno sa konsehal nagduso butong ang natungdan kag ginbutang pa niya ang City Council sa kalainan ukon bad light.
Suno kay Espino, ang isa ka resolusyon kun ginbotohan kag ginpasar, indi na ini sentimyento sang author kun ini ang sentimyento na sang bug-os nga City Council.
