Mangin chairman sang Committee on Information and Communications Technology kag Committee on Tourism sa Sangguniang Panlungsod sang Bacolod si Councilor-elect Jason Villarosa santo sa initial meeting nga ginpatigayon sang mga nagdalaog nga kandidato sa Team Asenso sang tinalikdan nga semana.
Sa interview sang Bombo Radyo kay Villarosa, ginpahayag sini nga sang tinalikdan nga semana, nagpatigayon sang meeting ang Team Asenso kag may mga ginpangpropose na sila nga commitee.
Santo sa ila nakasugtan, siya ang magapamuno sang Committee on ICT kag Tourism kag bilang isa ka millenial kag kabahin sang youth sector, ginakabig sini nga advantae ang gin-assign sa iya nga komitiba bangud may ihibalo na ini tuhoy diri kag iya ini matutukan sang maayo.
Aminado si Villarosa nga mabug-at ang chairmanship apang ini ang ginsalig sa iya ni Mayor-elect Albee Benitez kag sang kaupdanan sini nga mga konsehal gani sila ang magabuligay bilang isa ka team agud indi mabudlayan ang tagsa-tagsa.
Gindugang man sini nga subong pa lamang nagaplano na sila tuhoy sa Masskara Festival sa Oktubre.
Suno sa iya, magasugod gid sila sa scratch kag magacoordinate sa iban nga mga stakeholders agud mangin madinalag-on ang selebrasyon.
Suno diri, mataas ang ekspektasyon sang mga pumuluyo kay Benitez bangud man sa nagliligad nga mga events sang Team Asenso.
Nagalaom man si Villarosa nga magzero na ang kaso sang COVID-19 sa Oktubre agud madayon na gid ang Masskara Festival.
Sa karun wala pa nadihon sang Team Asenso kun sin-o ang mangin direktor sang Masskara apang ila na ginatugyan ang desisyon kay Benitez.
