Ginpasalig ni Bacolod City Councilor-elect Wilson “Jun” Gamboa Jr., ang naga-isahanon nga Team El Cid nga nakasulod sa konseho nga siya ang magakolaborar sa mga programa kag proyekto nga makahatag benepisyo sa ciudad apang magaserbe nga minority kun makita nga ini ang disbentaha sa ciudad.
Si Gamboa, nga ika-siyam sa mga na-eliher nga konsehal sa Bacolod City ang nakahakot sang 118,955 votes.
Sa interview sang Bombo Radyo Bacolod kay Gamboa, ang kadalag-an ang indi lang para sa iya ukon sa Team El Cid kundi kadalag-an sa mga magagmay nga sektor sang mga jeepney kag tricycle drivers, mga vendors sa merkado, trabahante, mga estudyante kag iban pa.
Ginpasalamatan man sini ang tanan nga nagsuporta sa ila, ang mga nagpulaw-bugtaw kag nagsulay sa init kag ulan.
Indi naman bag-o kay Gamboa ang sitwasyon bangod naga-isahanon man ini nga nagdaog sang 2019 election.
Mas mamag-an naman sa iya ang pagtrabaho bangod halos tanan sa elected officials ang nakatrabaho naman sini sadto, partikular na si Vice Mayor-elect Claudio Jesus “Kalaw” Puentevella nga kaupod sini sadto sa partido.
Suno diri, nakahibalo na ang iya mga kaupdanan sa politika nga ang mga isyu nga ginabatikos sini ang indi personal.
Pasalig ni Gamboa nga siya ang magakolaborar sa administrasyon bangod parehas man nga kauswagan sang ciudad sang Bacolod ang ila nga handom.
Paathag sini nga siya ang magakooperar kun makita nga bentaha para sa mga Bacolodnon ang mga programa kag proyekto, apang magaserbe lamang nga minority kun makita nga ang ipatuman ang makamalain sa mga Bacolodnon.
Nakabatun ini sang impormasyon nga halos isa na lamang ka oras ang ginapatigayon nga mga session sa konseho, nga nagakahulugan nga wala na sang nagakwestyon.
Apang sadto, nagakalab-utan sila sang alas-7:00 sang gab-i bangod luyag sini nga mapatpat gid sang maayo ang mga ginapropose nga ordinansa.
Kalakip sa focus sang iya panggobyerno ang public services kaangay sang kuryente, tubig kag transportasyon.
Nagalaom ini nga magabantay man ang iban nga miyembro sang Team Asenso, kag siya ang magaserbe nila nga tingog sa konseho.
