Gin-athag ni Councilor-elect Vladimir Gonzalez, nga amu ang mangin in-charge sang mass housing program sang administrasyon ni Mayor-elect Albee Benitez, nga indi libre nga balay ang ipanagtag sa mga Bacolodnon kundi sila ang magahatag sang solusyon kun paano masarangan sang mga pumuluyo ang pag-angkon sang kaugalingon nga balay kag duta.
Sa interview sang Bombo Radyo kay Gonzalez, ginpahayag sini nga ang tinalikdan pa lamang nga tuig, nagsugod na ang ila konsultasyon sa mga barangay agud mahibaluan kun paano maimplementar ang programa.
Suno sa iya, kapin 50,000 ka pamilya ang ila ginalantaw nga mangin benepisyaryo sang proyekto.
Suno diri, indi ini libre kundi magahatag sila sang nagkalain-lain nga mga acquisition program kun diin ang masarangan sang kada pamilya nga mabayaran kada bulan kag sarang nga mabayaran sa sulod sang 30 ka tuig.
Sa una nga tuig sang programa, target sang mga ini nga makatukod sang 5,000 unit kag sa ila nadihon nga plano, magatukod ang mga ini sang apat ka panalgan nga building kag ang kada floor ang may 24 ka units.
Luyag man ni Benitez nga expandable ang unit gani ginrekoment ni Lacson nga himuon ini 3.5 x 8 ukon 28 square meters.
Gindesinyo man nila ini nga matas ang ceiling kag sarang mabutangan sang solar agud makatipid sa kuryente ang mga pumuluyo.
Magasugod sila sa P5 billion nga pondo apang indi magpangutang ang ciudad kundi magapangayo sang bulig sa national government.
Suno sa iya, tinutuyo sang proyekto nga makahatag sang choices sa mga Bacolodnon agud sila ang mahatagan sang disente nga puluy-an.
Ginakalipay man sini nga may mga nagpabutyag na sang willingness sa pagsuporta sang programa sang palaabuton nga administrasyon kag luyag magdonar sang duta.
Suno kay Lacson, ila pagahimuon nga prayoridad ang mga tumandok sang Bacolod kag isa sa mga pamaagi agud masiguro amu nga tsekyaron nga sila ang rehistrado. SAMTANG…Gin-athag ni Councilor-elect Vladimir Gonzalez nga wala sang kaangtanan ang iya personal nga negosyo sa assignment sini nga mangin in-charge sang mass housing program sang administrasyon ni Mayor-elect Albee Benitez.
Sa interview sang Bombo Radyo kay Gonzalez, ginpahayag sini nga iya mismo ang naghingyo kay Benitez nga siya ang mangin in-chargebangud masobra 30 ka tuig na ini nga yara sa housing development kag nagapati ini nga siya ang makabulig agud matigayon ang programa sang incoming administrasyon.
Bangud nga yara ini sa housing business, may mga nagahambal nga basi negosyohan sini ang programa sang gobyerno apang gin-athag sang incoming councilor nga ang iya negosyo ang para sa mga makasarangan magbakal sang balay samtang ang housing program ang para sa mga Bacolodnon nga wala sang ikasarang.
Suno sa iya, indi conflict of interest ang iya negosyo kundi isa ka bulig kag dako nga advantage ang pila ka dekada na sini nga eksperyensya sa housing development.
Gindugang man sini nga bag-o lamang siya sa politika kag indi sini paghigkuan ang iya pangalan nga ginpundar sang pila ka tuig kag mag-usar sang kwarta sang gobyerno bangud indi sini kinahanglan nga mangawat agud makapangabuhi sang insakto.
Ginpasalamatan sini ang oportunidad nga ginhatag sa iya kag nagpromisa nga pagaserbihan sini sang maayo ang mga pumuluyo agud sila ang makabenepisyo.
