Temporaryo nga nagpungko bilang acting mayor sang ciudad sang Bacolod si Number 1 Councilor Israel Salanga humalin sang Desyembre 5 tubtob subong nga adlaw, Desyembre 7.
Ini matapos nga nagpadulong sa Macau, China si Mayor Alfredo “Albee” Benitez para sa Regional Development Council (RDC) meeting bilang chairperson sa RDC Region 6, samtang si Vice Mayor El Cid Familiaran ang nagpadulong naman sa Manila para magbatun sang Local Legislative Award 2023.
Nahibaluan nga ang pagbyahe ni Benitez sa China ang agud mangin representante sa bug-os nga Western Visayas sa ika-apat nga RDC meeting kag mapromote ang responsibilidad kag vision sini para sa proactive Western Visayas kalakip na ang pagdevelop sa Bacolod City agud mangin isa ka Super City.
Ang alkalde ang naglakat sang Desyembre 5 tubtob Desyembre 7.
Sa pihak nga bahin, bangod sa exemplary performance sang Sangguniang Panlungsod sa Bacolod, si Vice Mayor Familiaran ang nagbyahe man sa Manila halin Desyembre 5 kag magabalik sa Desyembre 8 bangod sa pagbatun sang Local Legislative Award 2023.
Paathag ni Familiaran nga gintunga sa nanarisari nga kategorya ang kada local government units (LGUs) kun sa diin ang Bacolod City ang nalakip sa 33 ka mga Highly Urbanized Cities sa Pilipinas.
Paathag sini nga ang awarding ang nakabase sa performance sang national, regional, provincial, cities kag municipal councils kaangay sa ila nga mga agenda kag reports humalin sang 2019 tubtob 2022.
Kun sa diin gikan sa 33 ka mga Highly Urbanized Cities ang Bacolod City ang nangin 2nd Runners Up, samtang 1st runners up naman ang Mandaue City kag Champion ang Quezon City.
Ini ang dako na nga bagay suno kay Familiaran partikular na nga yara sa kapin P33 billion ang annual budget sang Quezon City samtang masobra P7 billion naman ang budget sang Mandaue City.
Sa pihak nga bahin may ara lamang sang masobra P3 million nga annual budget ang ciudad sang Bacolod, gani mas gamay ang kapasidad sa pagpatigayon sang madamo nga mga programa.
Suno sa bise alkalde, makapila naman nadala ang Bacolod City sa nominees samtang sadto nakaagi naman nga nangin champion ang ciudad.
