Emosyonal nga nagapangayo sang pasaylo ang konsehal sang La Castellana sa nabiktima sang illegal recruitement sa luyag nga makasulod sa Philippine National Police nga imbulbado ini kag si Mary Jun Delos Santos.
Nagahilibion nga nagpangayo sang pasaylo si La Castellana Councilor Donato “Natnat” Dumaguit bangud sa natabo nga recruitement scam.
Suno kay Dumaguit, pareho sang mga biktima siya ang nabiktima man ni Delos Santos bangud nagpati gid siya diri kag indi man sini kagustuhan nga matabo ang natabo sa mga aplikante.
Ginpahayag sini nga wala ini sang nakuha nga kwarta nagikan sa ginbayad sang mga aplikante bangud ginadirekta niya ang mabaton kay Delos Santos nga indi na sini macontact sa karun.
Matapos nga madulaan sang contact kay Delos Santos wala na makahibalo si Dumaguit kun ano pa ang ginpangayo sang natungdan sa mga nabiktima sini bangud gindumilian ang mga nag-apply nga magcontact sa iya.
Samtang wala pa siya nakapablotter batok kay Delos Santos bangud nagpalagyo ini matapos sang ginaalegar sini nga nabaton nga pamahog nga ipapatay siya sang alkalde.
Nakahibalo man ini nga may yara pa sang mga tawo sa La Castellana nga nakakilala kag nagapati sa iya kag ang mga ini ang nagacontact sa iya kag nagahatag sang pagpaandam nga indi lang anay magpauli.
Liwat niya ginpanindugan nga makapakita kag masungka lamang ini kun malagas sang mga otoridad si Delos Santos nga ginapahayag mapatigayon sa mga aplikante nga mahapos makasulod sa PNP.
