Ginakabig sang Chairman sang Committee on Education sa Bacolod City Council nga dako nga kontribusyon sa plano sang Department of Education (DepEd) nga mabalik ang face-to-face classes ang nangin excellent performance sang Pediatric Vaccination sang edad lima tubtob onse anyos sang Lunes.
Ginapasalamat ni Bacolod City Councilor Renecito Novero nga nakigbahin ang mga ginikanan kag kabataan sa nasambit nga vaccination drive.
Paathag ni Novero nga sa tion nga magdamo na ang mga estudyante nga mangin fully vaccinated batok sa COVID-19, mas mangin mahapos naman sa DepEd ang pagpabalik sang face-to-face classroom instruction.
Dugang pa sang konsehal nga pinaagi sa pagpabakuna, mas makaseguro ang mga kabataan kag manunudlo nga magareport sa eskwelahan kag kasunod na sini ang amat-amat nga pagbalik sa normal sang kabuhi.
Ginahulat naman ni Novero ang mangin desisyon sang National Office sang DepEd natuhoy sa pag-implementar sang face-to-face classes sa syudad sang Bacolod karun nga ginpanaog na sa Alert Level 2 ang COVID-19 status.
Suno sa konsehal, magagikan sa local school board kag sa local government unit (LGU) ang rekomendasyon sa pagpatuman sang face-to-face classes apang ang National Office sang DepEd gihapon ang ulihi nga magadesisyon.
Madumduman nga ang Alangilan National Highschool palang ang una nga nakapatuman sang pilot face-to-face classes sa DepEd division of Bacolod City, apang suno kay Novero, dugangan pa ini kuntani sang tatlo ukon apat ka eskwelahan kun wala nagsaka sa Alert Level 3 ang status sang syudad.
Nagalaum sang konsehal nga liwat na ini nga madugangan karun nga liwat na nga nagpanaog ang Alert Level System.
Karun nga nagapadayun ang pagbakuna sa edad lima tubtob onse anyos, panugyan ni Novero nga dapat mapaathag pa sa mga pumuluyo ang importansya sang pagpabakuna tubtob sa makapatigayon na sang face-to-face classroom instruction sa publiko kag pribado nga buluthuan.
