“Purely harrassment,” ang tawag ni Councilor Jude Thadeus “Thaddy” Sayson sa gina-alegar pagfile sang kaso batok sa ila nga mga miyembro sang Bacolod City Council kag kay Mayor Alfredo “Albee” Benitez may kaangtanan sa pagbakal sang 75 hectares property sa Barangay Granada.
Sa interview sang Bombo Radyo Bacolod sa Chairperson sang Committee on Appropriations and Finance, gina-alegar sang complainant nga si certain Roger Ledesma nga wala sang Department of Agrarian Reform (DAR) clearance ang duta, nga nagakahulugan nga ginapahayag sini nga covered sang Comprehensive Agrarian Reform Program (CARP) ang propedad.
Apang paathag ni Sayson nga basic requirements sa pagbakal sang duta ang pagsecure sang DAR clearance.
Antes paman magbakal, na-antisipar na sang mga ini nga madamo sang magagwa nga mga complaints pagdangat sang campaign period, gani ginseguro nila nga mapangayuan sang DAR clearance ang mga land owners.
Gani sang maglapta sa social media ang kopya sang dokumento nga ginsumiter sa Office of the Ombudsman, nakayuhom na lamang ini bangod sila ang kampante batok sa isyu.
Suno diri, sa pagbakal sang duta, yara na sa checklist nga dapat indi covered sang CARP ang propedad, samtang may requirements naman sa pag-acquire sang duta nga covered sang programa.
Suno kay Sayson, purely harrassment ang purpose sang pagfile sang complainant nga sa nabatian sini, executive assistant sa Silay City.
Pahanumdom sini nga indi makatransfer sang land title nga wala sang DAR certification bangod ini ang indi pahanugutan sang Bureau of Internal Revenues, samtang indi man magsugod ang Registry of Deeds kun wala sang DAR kag BIR clearance.
Pasalig ni Sayson nga yara sa Bacolod City Legal Office ang mga dokumento.
Sa karun, wala pa ang mga ini sang nabatun nga notice gikan sa Ombudsman, apang kun may idagdag nga subpoena, sila ang nakahanda nga mag-atubang.
