Wala pa sang nareport nga mga nagakapatay nga baboy bangud sa African Swine Fever (ASF) ang ciudad sang Bacolod.
Sa interview sang Bombo Radyo kay Bacolod City Councilor Thaddy Sayson, ginpaathag sini nga indi nagakahulugan nga kun napatay ang baboy, ini ang na-igo sa ASF bangud may test pa nga ginhimo kag kinahanglan nga ikumpirmar ini anay sang Department of Agriculture (DA).
Suno diri, ang pagkapatay sang mga baboy ang posible bangud sa tuman ka init nga pahanon.
Paathag sini nga may mga reported deaths sa baboy sa sur nga bahin sang Negros Occidental apang wala pa ini nakumpirmar kun ano ang rason.
Pahayag sini, indi ini tion nga mag-panic sa baylo dapat siguruhon ang bio security sang mga kasapatan nga nagagwa sulod kaangay sang mga manok, pispis kag ido nga mahimo magdala sang kagaw nga makatuga sang balatian sa mga baboy.
Suno kay Sayson, kun may mareport nga nagakapatay nga baboy gilayon man nila nga i-activate ang ila ASF Task Force.
