Indi pa magsaylo ang mga Manokan Country Vendors sa parking area sang SM subong nga adlaw, Hulyo 5, bangud may yara na sang naestoryahan nga sa Hulyo 20 nalang bangud kinahanglan pa nila nga magpatakod sang linya sang kuryente kag tubig.
Sa interview sang Bombo Radyo Bacolod kay Councilor Vladimir Gonzalez, Chairman, Committee on Urban Poor, Housing, and Resettlement sa Sangguniang Panlungsod, personal siya nga nagpadulong sa Manokan Country kaupod ang Punong Barangay sang Barangay 12 kag nakahinun-anon sini ang 15 ka mga vendors nga may active account kag may yara naman sila sang naestoryahan.
Suno kay Gonzalez, ginrelay man sini sa alkalde ang luyag sang mga vendors nga mag-extend sang canopy sa dalan agud nga maka-accommodate sila sang dugang nga mga customers.
Suno diri, gin-abisuhan siya sang alkalde nga isulat ang mga nakasugtan kag nagpasalig naman ang mga vendors nga subong nga adlaw ihatag man nila ang napirmahan na nga agreement santo sa ila naestoryahan.
Indi pa masiguro kun pila gid sa masobra 20 ka mga vendors sang Manokan Country ang magaoccupy sa parking area sang nasambit nga mall bangud 15 lamang ang may active account.
Wala sang bayad ang pag-okupar sang mga vendors sa temporaryo nila nga sayluhan apang kinahanglan nila nga magbayad sang kuryente kag tubig.
Suno kay Gonzalez kun luyag nila nga magpwesto sa likod sang Bacolod City Goverment Center apang kinanahanglan nila nga magbayad.
Nahibaluan nga may yara sang leasing agreement ang ciudad sang Bacolod kag ang SM Prime Holdings sa sulod sang 40 ka tuig, gani kinahanglan nga magsaylo ang mga tenants para sa renovation.
