Ginkakibot kag nadisappoint si Bacolod City Counsilor Wilson “Jun” Gamboa Jr. sang nagreport ang City Budget Officer nga si Ma. Imelda William nga may-ara pa sang nabilin nga P200 million sa halos tunga sa bilyon nga budget para sa COVID-19 response.
Suno kay Gamboa, ginapangabay sini sa gobyerno nga gastuhon ang budget agud nga indi magcollapse ang health care system.
Ginapamangkot sini kun ngaa ara lang sa bangko ang kwarta nga ginpartinisir para sa pakipag-away sa COVID-19 kag wala gingastos.
Dugang pa sini nga damo na ang napatay kag nagmasakit yara lang sa bangko ang P200 million kag magadugang naman sang P113 million.
Suno pa sa konsehal wala na ini nag kwestyon kag namangkot sadto bangod na aprubahan na ang halos P450 million nga pondo apang mahibaluan nalang sini nga madamo pa ang wala nagamit.
Ginapangabay sini nga ipakita diri ang record, kun sa diin nagkadto, pila ang nabilin kag pila ang sarang pa nga magasto.
Nagapati naman ini nga dapat mangin preparado kag importante nga mahibaluan ang pondo agud nga makapangaman kun pila pa ang savings nga sarang magamit.
Pahayag sini nga ginsambit diri ni CDRRMO cluster head executive assistant Joemarie Vargas nga P15 million nalang ang nabilin humalin sa P300 million nga budget para sa kalamidad apisar nga katunga palang sang tuig.
Ginalantaw nga may pila pa ka mga kalamidad ang magasulod kaangay sang mga bagyo apang wala na sang nabulin nga budget gani luyag sini nga pangitaon ang iban pa nga budget sang ciudad.
Gina-athag sini nga ang pagpangayo sang accounting liquidation indi agud nga mangin ma-id-id sa pondo kundi agud nga makita ang sarang pa nga mahemu pinaagi sa pondo.
Bangod nga public fund ini, kinahanglan nga I-liquidate kag ma audit ini, apang bangod sa krisis, luyag lang sang konsehal ang bisan run down lang sang pondo.
Ginkumpirmar man sini nga wala sang personal nga kaangatanan ang pagpangayo sang record.
