Nagalaom si Bacolod City Councilor Wilson Gamboa Jr. nga mahatagan pagtamod ni Presidente Rodrigo Duterte kag sang Department of Transportation ang resolution nga gin-author sini tuhoy sa pagsuspendi sang implementasyon sang Motor Vehicle Inspection Center (MVIC) sa ciudad.
Sa interview sang Bombo Radyo kay Gamboa, ginpahayag sini nga may mando na mismo nagikan sa Presidente sang Marso tuhoy sa pagsuspendi sang pag-implementar sang MVIC sa bilog nga Pilipinas gani natingala ini kun ngaa gintinguhaan gid nila nga ipatuman ini sa Bacolod City.
Suno sa iya, ang iban mga local government units sa pungsod ang wala nagapatuman sini gani nagalibog ang iya ulo kun ngaa nagmato-mato ang Land Transportation Office sang ciudad sa pag-implementar sang MVIC.
Natingala man ang konsehal kun ngaa wala man lang sang may ginhimo ang LGU agud ini ang mapauntat.
Suno diri, halit kaayo ang pagpatuman sini bangud madamo ang nagareklamo, kag ang mga drivers ang makapila ka beses nga ginapabalik-balik gani nagakabudlayan.
Nagalaom si Gamboa nga ginpadala gilayon sa Office of the President kag DOTr ang iya resolusyon agud masuspendi ang implementasyon sang MVIC sa ciudad.
