“Change of collar, but the same dog,” ini ang paglaragway ni Councilor Wilson “Jun” Gamboa sa karun nga water distribution utility sa Bacolod City.
Sa interview sang Bombo Radyo Bacolod kay Gamboa, convenor sang Amlig Tubig, ang ginalauman nga Super Super El Niño halin Nobyembre nga magalawig pa tubtob sa 2027, ang mahimo mangin sulit sang 1877 drought nga nagpatay sang 50 ka milyon.
Apang sa pihak sini, nagapati si Gamboa nga wala sang preparasyon ang water distribution utility sang ciudad.
Para sa konsehal, ang PrimeWater gihapon ang nagapadalagan sang operasyon, kag ang Hiraya Waters ang nagbakal lamang sang share sang kompanya.
Suno diri, mahimo nga ini ang political accomodation agud mahatagan sang ligwa ang Villar siblings sa Senado gikan sa issue sang PrimeWater, bangod kinahanglan pa ang ila nga boto para sa impeachment.
Suno kay Gamboa, nag-anunsyar ang Hiraya Waters nga magapagwa sang P6.9 billion investment lamang para sa tanan nga ginsalo nga operasyon sang PrimeWater, gani indi ini magpati sa pahayag ni Congressman Alfredo “Albee” Benitez nga P3 billion ang idagdag nila sa ciudad sang Bacolod.
Pahanumdom ni Gamboa nga wala gid sang development nga nahatag ang PrimeWater, bangod wala man sang gindugang nga tubo, kag wala man sang ginpasulod nga bag-o nga water source.
Kadungan sang pasalig sadto nga pagpasulod sang dako nga capital, yara pa sa 300 ang namonitor sini nga mga leakages.
Nagakahulugan lang nga bisan sa maintenance, may dako nga kakulangan ang PrimeWater.
Gani kwestyon sini kun diin nagkadto ang ginasukot sa mga konsumedor sa sulod sang lima ka tuig nga operasyon, nga P150 million tubtob P200 million kada bulan.
Nagapati si Gamboa nga sa likod sang Hiraya, PrimeWater gid gihapon ang nagadumala, bangod wala man sang pagbag-o sang mga tawo.
Gani wala na ini nagapati nga may preparasyon ang water distribution utility sa ginapaabot nga Super El Niño.
Panawagan man sini sa Board of Directors sang Bacolod City Water District nga indi batunon ang Hiraya, tubtob wala nila nabayaran ang mga obligasyon ukon ka-utangan sang PrimeWater, bangod para diri ang pagsalo pa lamang sa kompanya nga tuman ka damo sang issue, ang makabig na nga kwestyonable.
