Mapalaron nga nakadaog sang P50,000 nga cash nga gindugangan pa sang pump boat ang bag-o nga mag-asawa sa raffle kasunod sang mass wedding nga gin-officiate ni Bacolod City Mayor Alfredo “Albee” Benitez sa courtyard sang Bacolod City Government Center.
Sa pahayag ni Benitez, indi kaangay sang nakaligad nga tuig nga nagdangat sa 2023 ang pares sang ginkasal, sang Sabado 12 lamang ka couples ang nagdesisyon nga mag-upod sa mass wedding.
Nangin solemn naman kag emotional ang kasal nga ginpatigayon nga tuman gid nga ginpasalamatan sang mga couples.
Magluwas kay Benitez nagtambong man sa mass wedding sanday Vice Mayor El Cid Familiaran kag Councilors Em Ang, Ising Salanga, Renato Novero, Simple Distrito, Jason Villarosa, Pao Sy kag Sangguniang Kabataan chairperson Danna Marie Barzo.
Kasunod sang mass wedding, may ginpatigayon naman nga gamay nga programa kun sa diin nalakip ang raffle draw.
Mapalaron nga nagdaog ang bag-o nga mag-asawa nga sanday Alvin Mallorca kag Ereca Pugalas, residente sa Purok Tangigue, Barangay 1, Bacolod City sang P50,000 nga cash.
Sang ginpamangkot kun diin gamiton ang kwarta, ginpahayag sang mga ini nga ila ibakal sang pump boat bangod pagpangisda ang ila palangitan-an.
Bangod nakita nga deserving man ang mag-asawa, nagdesisyon ang alkalde upod sa mga konsehal nga magluwas sa cash, hatagan nalang ang couple sang pump boat, agud indi na mabuhinan ang ila cash reward.
Magluwas sa couple, duha pa ka pares ang nakadaog sa raffle, nga ginalakipan nanday Peter Parcon kag Gena Babac nga nakadaog sang P30,000 kag sanday Alvin Padilla kag Pearnchend Penia nga nakadaog naman sang P20,000.
