Nagpanawagan ang convenor sa Water Watch Negros nga kinahanglan ang madasig nga tikang agud masolusyunan ang problema sa tubig sa ciudad sang Bacolod.
Sa interview sang Bombo Radyo Bacolod kay Wennie Sancho, maayo nga butang kun para sa kaayuhan sang Bacolodnon ang pagkompanya nga nagapakita sang interes nga mangin water concessionaire sa ciudad.
Apang panindugan sini nga kinahanglan ang madasig nga tikang sa pagsolbar sang problema.
Ini bangod tuman na kadamo ang nagareklamo sa Bacolod City Water District (BACIWA) – Prime Water bangod pila ka mga Barangay sa ciudad sang Bacolod ang malawig na nga naga-antos nga wala sang tubig.
Iban sa mga ini ang nagakinahanglan pa nga magbakal sang tubig kada adlaw agud lang may magamit, samtang nagabayad man sang minimum rate sa bill sang tubig apisar nga indi man makagamit.
Suno kay Sancho, indi na sini mahangpan kun ang BACIWA ang private owned company ukon government owned and controlled corporation (GOCC) kag ini ang dapat ipaathag sang Board of Directors bangod indi pwede nga sila ang dual identity.
Panawagan man sini sa Bacolod City Government nga komprontahon na ang board member sang BACIWA sa rasun kun ngaa madamo sang wala gihapon sang tubig, samtang lubog naman ang nagagwa nga tubig sa gripo sang iban.
Panawagan pa ni Sancho sa mga Barangay nga wala sang tubig nga maghimo sang resolusyon nga ipasa sa Office of the City Mayor kag BACIWA, agud nga gilayon nga mahimuan sang tikang ang nagadako nga problema.
Ginkwestyon naman sini ang pahayag sang BACIWA-Prime Water nga nag-ayo ang ila nga performance, nga suno diri ginhambal lamang agud ijustify nga sila ang makapabilin sa gahom apisar nga tuman ka damo sang wala sang tubig.
Suno diri, mas maayo nga ipalab-ot na sa National Government ang reklamo bangod kaangay nga wala man sang solusyon ang lokal samtang inutil man ukon wala sang pulos ang management sang BACIWA Prime Water.
Panugyan sini sa mga apektado nga Barangay nga magrally sa atubang sang BACIWA agud mabatyagan nila nga may-ara sang naga-antos.
Panawagan naman sini sa opisyales sang BACIWA Prime Water nga padulungan ang mga apektado nga Barangay kag ipaathag kun ano ang rasun kun ngaa wala sang masupply nga tubig sa mga nagabayad man nga konsumedor.
