Liwat nga nagpanguna sa may pinakamadamo nga nagdugang nga kaso sang coronavirus disease sa Region 6 ang ciudad sang Bacolod kahapon.
Sa COVID-19 Case Bulletin No. 156 nga ginpagwa sang Department of Health Western Visayas, 203 ka bag-o nga kaso ang nagdugang sa rehiyon kun sa diin 110 ang nagikan sa Bacolod City; 53 sa Negros Occidental; 17 sa Iloilo City; walo sa probinsya sang Iloilo kag Capiz; apat sa Guimaras; duha sa Aklan; kag isa sa Antique.
May 30 ka mga nagdugang nga nag-alayo sa balatian nga ginalakipan sang 10 nagikan sa Negros Occidental; siyam sa Iloilo City; pito sa Iloilo; tatlo sa Antique; kag isa sa Capiz.
Nadugangan naman sang lima ang death toll sa rehiyon kun sa diin tag duha ang nagikan sa Bacolod City kag Iloilo City kag isa naman sa probinsya sang Iloilo.
Sang Sabado, nagpanguna man ang ciudad sang Bacolod sa Region 6 matapos makarekord sang 131 ka mga kaso sang COVID-19 sa sulod sang 24 oras.
Sa kabug-usan may yara na sang 1,218 ka mga kaso sang coronavirus sa Bacolod City samtang 1,152 naman sa probinsya sang Negros Occidental.
Samtang temporaryo naman nga pagasiraduhan ang Regional and RDO 77 – Bacolod City offices sang Bureau of Internal Revenue, Revenue Region No. 12 Bacolod City sumugod Setyembre 1 tubtob Setyembre 4 para sa disinfection.// Magabalik ang regular office sini sa Setyembre 7.
