171 ang panibag-o nga nagdugang sa kaso sang COVID-19 sa probinsya sang Negros Occidental kahapon samtang 90 naman ang nagdugang nga kaso sa syudad sang Bacolod.
Sa COVID-19 Regional Case Bulletin No. 430 nga ginpagwa sang Department of Health Center for Health Development-Western Visayas, nadugangan sang 523 ang kaso sa Region 6.
Sa nasambit nga numero 21 diri ang nagikan sa Aklan; lima sa Antique; 138 sa Iloilo; 171 sa Negros Occidental; 90 sa Bacolod City kag 98 ang nadugang sa Iloilo City.
Bangud diri, nagdangat na sa 47,038 ang kabug-usan nga kaso sang COVID-19 sa Western Visayas kun sa diin nadugangan sang 183 ang mga nag-alayo sa balatian gani yara na ang kabug-usan nga recoveries sa 38,284 samtang nagdangat naman sa 1,127 ang death toll matapos madugangan sang isa ka nagtaliwan bangod sa virus.
Ang 171 ka mga nadugang nga kaso sang COVID-19 sa probinsya sang Negros Occidental ang lunsay mga local cases samtang 89 naman sa panibag-o nga kaso sang Bacolod City ang local cases kag isa ang authorized person outside residence (APOR).
Nagdangat na sa 9,549 ang kabug-usan nga kaso sang COVID-19 sa Bacolod kun sa diin 1,235 ang aktibo; 8,058 ang nag-alayo kag nagdangat na sa 254 ang nagtaliwan.
Samtang yara naman sa 14,886 ang kabug-usan nga kaso sang COVID-19 sa Negros Occidental kun sa diin 2,097 ang aktibo; 12,501 ang nag-alayo kag nagdangat na sa 280 ang death toll.
