Liwat nga nagdugang sang anom ang nagpositibo sa COVID-19 sa Western Visayas kag duha diri ang pumuluyo sang Negros Occidental.
Suno sa DOH COVID-19 case bulletin no. 82, si WV 152 ukon Neg. Occ. patient no. 23 ang isa ka 35 anyos nga lalaki, residente sa banwa sang Binalbagan, Negros Occidental.
Isa ini ka OFW repatriate kag ginkuhaan ini sang SWAB test samtang yara pa sa barko nagatrabaho sadtong Abril 28 kag nagpositibo, samtang nag egatibo naman ini sa 2nd test sang yara na sa USA.
Nag-abot ang pasyente sa Manila sang Hunyo 3 kag ginkuhaan sang swab test sang Hunyo 5 nga liwat nga nagnegatibo.
Ulihi naman ini nga ginswab test sang Hunyo 11, nag-abot sa probinsya sang Hunyo 12 kag naggwa naman ang resulta kahapon Hunyo 16 kag liwat naman ini nga nagpositibo.
Samtang si WV 153 ukon Negros Occidental patient no. 24 naman ang isa ka 46 anyos nga lalaki, residente sang San Carlos City, Negros Occidental.
Isa ini ka OFW repatriate nga nag-abot sa Clark Air Base sadtong Hunyo 6 kag nag-abot naman sa probinsya sang Hunyo 8 pinaagi sa sweeper flight.
Ginswab test ang pasyente sang Hunyo 11 kag naggwa ang positibo nga resulta kahapon Hunyo 16.
Lunsay yara sa quarantine facility ang mga pasyente nga lunsay mga asymptomatic.
Samtang sa pahayag ni Negros Occidental Governor Eugenio Jose “Bong” Lacson, nag-ayo na sanday COVID-19 patient no.1 tubtob 9 sang Negros Occidental.
