Isa ka 41-anyos nga lalaki nga OFW nga nag-abot sa Bacolod sang Mayo 13, 2020 sakay sa 2GO vessel ang nagpositibo sa COVID-19 kag ika-13 nga COVID positive sa ciudad.
Nagpaidalom ini sa RT-PCR test sang Mayo 19, anom ka adlaw matapos ini mag-abot sa ciudad.
Si Patient 13 ang nagikan sa isa ka international cruising vessel nga may port of exit sa Miami, Florida sang Abril 17, 2020.
Ginquarantine ini sa isa ka hotel sa Manila halin sang Abril 18 tubtob Mayo 12.
Ginpatigayon ang initial test sa Manila sang Mayo 2 kag nagnegatibo ang resulta sini.
Suno sa pasyente, asymptomatic ini.
Nahibaluan nga igatransfer sang City Health Office ang pasyente sa isa ka quarantine facility sa ciudad kag ipaidalom sa repeat RT-PCR test, duha ka semana matapos ang testing.
Suno sa statement ni Mayor Evelio Leonardia, pahanumdom ini sa tanan nga wala gihapon nadula ang virus.
Apisar nga napaidalum ang ciudad sa ECQ, GCQ ukon bisan ano man nga klasipikasyon, ang virus ang magapabilin gihapon.
Gani nagpahanumdum ang alkalde nga maghalong kag magpadayon sa pag-obserbar sang minimum health protocols kaangay sang pagsuksok sang face masks kag pag-obserbar sang physical distancing samtang nagapakigbato ang tanan sa COVID-19 pandemic.
