Ipa-verify pa sang chairman sang inter-agency task force against coronavirus sa ciudad sang Bacolod sa City Health Office kun ngaa nakagwa sa quarantine center si Patient No. 19 nga wala pa narelease ang test result sini.
Nahibaluan nga si Patient No. 19 sang Bacolod ang isa ka 35-anyos nga lalaki kag residente sang Celita Village, Barangay Alijis.
Isa ini ka locally-stranded individual (LSI) nagikan sa Manila.
Nag-abot ini sa Bacolod sadtong nagligad nga Mayo 26 kag gindiretso sa quarantine facility apang ginapahayag nga nakapauli sa ila balay sang Hunyo 9.
Ang amo nga pasyente ang asymptomatic kag wala sang pre-existing condition.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga luyag niya mahibaluan ang rason sang CHO kun ngaa nakagwa si Patient No. 19 sa quarantine facility nga wala pa nakagwa ang swab test result sini.
Ginkumpirmar naman sini nga ginkuha na sa ila balay ang amo nga pasyente kag gindala sa quarantine facility.
Walo tubtob napulo naman ka mga indibidwal ang na-contact trace sang otoridad kag ginlockdown ang lugar nga gina-istaran sini.
Dugang pa ni Familiaran nga tani mapahibalo ang mga naka-close contact ni Patient No. 19 agud nga madasig ang pag-trace sa ila.
Nahibaluan nga nagpositibo man sa COVID-19 si Patient No. 20 nga isa ka 38-anyos nga lalaki nga taga-Bacolod City kag isa ini ka repatriated overseas Filipino worker.
