Ginkumpirmar sang city administrator sang ciudad sang Bacolod nga nagasugod na sa pagplano ang mga miyembro sang COVID-19 Vaccination (COVAC) Council nga gintukod ni Mayor Evelio “Bing” Leonardia tuhoy sa pagmanage sang bakuna kun mangin available na ini.
Sa interview sang Bombo Radyo kay City Administrator Em Ang, ginconvene na ni Leonardia ang mga miyembro sang COVAC council kag nakapatigayon na sila sang initial meeting.
Suno kay Ang, nagasugod na sila sa pagplano kag ang una nga tikang amo ang pagtumod sang mga priority sectors nga hatagan sang bakuna.
Ila man ginatun-an ang nahanungod sa acquisition, pagpreparar sang vaccination centers kag logistics.
Suno sa iya, gin-assign naman ang mga committee para sa nagkalain-lain nga functions sang COVAC council.
Ginalauman man sini nga sa ikaduha nga quarter pa sang 2021 makasugod sang mass vaccination bangud ginabanta sa bulan sang Hulyo pa mangin available ang bakuna sa pungsod.
Suno sa city administrator, sa kapin 630,000 nga mga pumuluyo sang Bacolod City, katunga lang diri ang mahatagan sang bakuna sang national government gani kinahanglan nga makaprocure ang ciudad paagi sa mga donasyon, pagrealign sang pondo ukon pagbakal sang vaccine gamit ang local fund bangud ini ang prayoridad sang alkalde.
Suno sa iya, prayoridad sa pagahatagan sang bakuna amo ang mga health professionals kag frontliners subong man ang mga pigado.
Nagapati man si Ang nga ang Bacolod City ang labing una nga LGU nga nakatukod sang council kag nagasugod na sa pagtrabaho sang mga stratehiya.
