Ginkumpirmar sang pinuno sang Emergency Operations Center sang Bacolod City nga gin-aprubahan na sang Department of Health ang vaccination plan sang syudad.
Sa interview sang Bombo Radyo Bacolod kay City Administrator Em Ang, ang vaccination plan ang mangin basehan sang syudad sa pagpatigayon sang vaccination program.
Suno diri, duha pa lang sa bug-os nga Western Visayas ang naaprupbahan ang vaccination plan kag ini ang ginalakipan sang syudad sang Bacolod kag syudad sang Iloilo.
Suno kay Ang, sang tinalikdan nga Pebrero 11 gindeliver sa DOH ang plano kag makaligad ang pila ka adlaw, gin-aprubahan na ini.
Ginhingagaw sang syudad nga himuan sang vaccination plan bangud nagpagwa ang DOH sang pronouncement nga wala sang allocation sang bakuna nagikan sa national government kun wala sang approved nga vaccination plan.
Ginahulat pa sa karun ang bakuna nga nagikan sang national government bangud wala pa nag-abot.
Suno kay Ang, ang sigurado nga bakuna nga magaabot amo ang 650,000 doses nga nagikan sa AstraZeneca nga ginsiguro na ni Mayor Evelio “Bing” Leonardia sa pagbayad sang kapin P31 million.
Ginpahayag man sini nga padayon man ang pre-registration sa mga barangay apang manubo ang turn-put ukon madamo sa gihapon sang indi kumbinsido nga magpabakuna.
Sa karon,padayon pa ang ginapatigayon nga education campaign agud ma-athagan ang mga pumuluyo kon ano ka importante ang pagpabakuna.
