Ginpasalamatan sang executive director sang Bacolod Emergency Operation Center (EOC) ang ila partners matapos nga nangin madinalag-on ang kick off sang pagpatigayon sang pagbakuna sa mga kabataan nga nagaedad sang 5-11 years old sa syudad sang Bacolod kahapon.
Sa interview sang Bombo Radyo Bacolod kay Em Ang, ginpahayag sini nga madamo man sang nakigbahin sa kick off sang nasambit nga vaccination kun sa diin ginabanta nga malampuwasan ang target nga mabakunahan sa sulod sang isa ka adlaw.
Alas 08:30 sang aga kahapon, nag-umpisa na ang mga vaccination kag masadya bangud festive ang mood agud nga malingaw ang mga kabataan.
Suno kay Ang, ang mga kabataan ang may yara sang loot bag kag may may pamahawa kag ice cream nga ginhatag sa mga ini.
Suno diri wala man malipod nga may nagbisyo bangud sa edad sang mga ginpangbakunahan kag ginalauman man nila ini.
Suno pa kay Ang ginpatigayon ang kick off sa Valentine’s Day bangud ini ang best gift sang paghigugma bangud maproteksyunan na ang mga kabataan.
Ang pagbakuna sa mga kabataan ang pagpreparar man sang mga ini sa pagbalik sang face to face classes.
Ginalantaw naman sang consultant sang Bacolod Queen of Mercy Hospital nga mahimo nagsobra naman sa 100 nga target nga mabakunahan nga 5 tubtob 11 anyos matapos nga madamo man sang mga kabataan ang nagpabakuna sa nasambit nga ospital.
Suno kay Dr. Evangeline Johnson ginpreparahan gid sang mga ini ang nasambit nga vaccination bangud isa ang Bacolod Queen of Mercy Hospital sa ginpatigayunan sang kick off sang vaccination.
Ginpatuman man sang mga ini ang mga gimmick kaangay sang pagdekorar nga daw kaangay may childrens party.
Bangud sini wala sang makita nga bata nga ginabakunahan nga nagahibi bangud nalingaw na ang mga ini sa palibot.
Ginpasalamatan man sini ang nagsponsor agud matigayon ang nasambit nga gimmick sa kick off.
Kalabanan man nga nakigbahin sa vaccination kick off ang mga head nurse kag supervisors.
Nahibaluan nga magluwas sa Bacolod Queen of Mercy Hospital, ginpatigayon man ang kick off sa Riverside Medical Center, Corazon Locsin Montelibano Memorial Regional Hospital kag City Health Office sang syudad.
