Nagpatigayon sang Cardiopulmonary Resuscitation (CPR) training sa Bacolod City Government Center kahapon Oktubre 22.
Ini sa pagpanguna sang Bell-Kenz Pharma, nga ginpartisiparan sang mga government employees, fronliners, stakeholders, Barangay personnel, kag nanarisari nga sektor, kalakip na ang senio citizen, person with disability (PWD), kag iban pa.
Sa interview sang Bombo Radyo Bacolod kay Dr. Jose Joel Yap, cardiologist, sa idalom sang layi, dapat CPR ready ang Pilipinas kaangay sa mga katupad nga Southeast Asian countries.
Lakip diri ang Republic Act No. 10871 ukon Basic Life Support Training in Schools Act.
Suno kay Dr Yap, karun nga tuman ka init sang panahon bangod sa Super El Niño, nagataas man ang risgo sa mga cardiac arrest ukon stroke.
Gani dapat nga tanan ang may Basic Life Support Training agud kun may kaangay nga hitabo sa diin man nga lugar kaangay sang balay, mall, port kag bus terminal, eskwelahan, ukon diin paman nga public places, may-ara sang gilayon nga makaresponder.
Pahanumdom sang doktor nga CPR saves life.
