Nagpasalig ang presidente sang Central Philippine State University (CPSU) Main Campus sa Brgy. Camingawan, Kabankalan City nga hatagan nila sang nagakaigo nga tikang ang natabo nga bomb threat sa ila buluthuan.
Sa interview sang Bombo Radyo kay CPSU president Aladino Moraca, nakabaton sila sang bomb threat paagi sa mensahe sa messenger kag gilayon man sila nga nagtawag sang suporta halin sa kapulisan kag Explosive Ordnance Disposal and Canine (EOD-K9) team.
Suno diri, gintsekyar ang area kag wala sang nakit-an nga bomba sa lugar.
Suno pa diri, karun lamang natabo nga nakabaton sang amo nga pamahog ang ila buluthuan.
Sa paglantaw ni Moraca, mahimo nagsunod-sunod lang ang iban sa nagakatabo man sa mga buluthuan sa Iloilo City nga pila na ka adlaw nga nagabaton sang bomb threat.
Pahayag ni Moraca, may inisyal nga impormasyon na sila kag may yara na sang person of interest sa likod sang insidente apang indi pa ini nila mabuyagyag samtang wala pa nakumpirmar sang kapulisan ang identity sang nagapalapta sang pamahog.
