Nagalaom ang mga manugbaligya sa Vendors Plaza nga hatagan sang ctiy government sang igtalupangod ang pagpakaayo sa comfort room sa amo nga merkado.
Sa interview sang Bombo Radyo kay Rosinie Biñas nga nagabaligya sang mga panakot sa Vendors Plaza, gin-ako sini nga nagsaka na ang ila benta humalin sang ginpalabay diri ang ruta sang mga jeep nga nagabyahe sa sur sang Bacolod, indi kaangay sadto nga 30 pesos lang ang ila benta halin sa aga tubtub maggab-i.
Ang problema lang sa karon suno kay Biñas amo ang kakulang sang CR kun sa diin nagalanga-langa ang mga ini kun sa diin mangihi.
Bangud sini, nagakapilitan sila nga magsulod sa malapit nga mall agud nga makagamit sang CR.
Kun gab-i suno kay Biñas, nagapinangsot lang sa Vendors Plaza bangud bisan diin lang nagapangihi ang mga lalaki.
Suno naman sa manugbaligya sang prutas nga si Bebot Rama, may comfort room man sadto sa Vendors Plaza apang madugay na ini nga barado kag wala nakaayo gani indi magamit.
Tinalikdan nga adlaw, ginsuguran sang City Disaster Risk Reduction and Management Office ang pagdeclog sa mga kanal sa merkado.
Nagalaom naman ang mga ini nga magasanyog ang ila bentahanay kun mag-amat-amat na damo ang mga nagasayo sa Vendors Plaza.
Nahibaluan nga may yara sang banda nga nagatukar diri kun gab-i.
Biyernes sang aga, ginpahayag sang pinuno sang Bacolod City Engineer’s Office nga ila tinguhaan nga makaayo ang comfort room sa Vendors Plaza sa mas madali nga panahon kasunod sang pagsaylo diri sang mga manugbaligya nga apektado sang demolisyon.
Nagpadulong sa Vendors Plaza sanday Bacolod City Administrator Atty. John Orola kag City Engineer Belly Aguillon.
Sa interview sang Bombo Radyo Bacolod kay Aguillon, ginpahayag sini nga pag-ilis sa atop sang comfort room ang immediate repair nga ila mahimo apang kinahanglan gid nga pintahan ang building kag maka-function ang barado nga toilet.
May yara sang P25 milyones nga pondo para sa repair kag pagpatahom sang Vendors Plaza apang aprubahan pa ini sa pagsinapol sang City Development Council sa una nga semana sang bulan sang Oktubre.
Aminado man ini nga kinahanglan patahumon ang Vendors Plaza antes ang MassKara Festival bangud isa ini sa mga festival sites.
Samtang, nagbalibad naman ini nga magkomento tuhoy sa paglaksam sang facade sang Business Inn sa sidewalk sa dalan Lacson.
Suno sa city engineer, trabaho ini sang Office of the Building Office kag Department of Public Works and Highways bangud national road ang dalan Lacson.
