Madinalag-on nga nakumpleto sang crew sang Artemis II ang ila nga lunar flyby kag yara na sila sa ulihi nga bahin sang ila misyon.
Ini ang pagbalik sa Earth nga ginalauman matabo subong nga aga, (oras sa Pilipinas), kun sa diin matapos ini sa isa ka splashdown sa Pacific Ocean malapit sa San Diego, California.
Santo sa report, maga-umpisa ang reentry operations ala-1:50 sa kaagahon, kag sa takna nga alas-7:33 sang aga makit-an na nga nagabulag ang Orion spacecraft sa service module sini.
Sa pagsulod sini sa atmosphere, mahimo malab-ot sa 3,000 degrees Celsius ang temperatura bangud sa mabaskog nga aerodynamic heating.
Ginabanta magabukas ang parachutes sa takna nga alas-8:03 sang aga, agud mapahinay ang paghugpa sang spacecraft antes ang ginalauman nga splashdown karun alas-8:07 sang aga.
