Nagnubo sang kapin 66 porsyento ang crime incidence sa Western Visayas bangud sa restrictive measures nga ginapatuman agud mapunggan ang paglapta sang coronavirus disease 2019 (COVID-19).
Sa interview sang Bombo Radyo Bacolod kay Police Lt. Col. Gilbert Gorero, acting chief of Regional Plans and Strategy Management Division kag concurrent spokesperson sang Police Regional Office-6 (PRO-6), ginpahayag sini nga may yara lamang sang 214 ka mga major criminal incidents nga narekord humalin sang Marso 17 tubtob Mayo 10 samtang sa kaangay nga period nagligad nga tuig, nagadangat ini sa 628 ka mga insidente.
Suno kay Gorero, nagnubo ini sang 414 ka mga kaso bangud sa stay-at-home order sa idalom sang enhanced community quarantine (ECQ).
Sa 8 focus crimes, nagsarurot sang 84 porsyento ang carnapping.
May yara lamang sang apat ka mga kaso sang kinawatan nga mga motor vehicles humalin sang Marso 17 tubtob Mayo 10.
Sa kaangay nga period nagligad nga tuig, may yara ini sang 25 ka mga kaso.
Nagnubo man sang 79.51% ang theft kun sa diin may yara lamang ini sang 34 cases nagikan sa 166 samtang ang robbery cases ang nagnubo man sang 74% ukon 20 cases nagikan sa 77.
Nagsarurot man sang 40% ang murder cases kun sa diin 42 lamang ang narekord sa amo nga period nagikan sa 70 cases.
Nagnubo man sang 33.33% ang homicide cases kun sa diin 20 cases nalang ini nagikan sa 30 cases.
57.31% man ang gin-nubo sang kaso sang physical injuries nga may 20 cases nagikan sa 30 cases.
Kag ang rape cases ang nagnubo man sang 75% ukon 24 cases nalang ini nagikan sa 96.
Suno kay Gorero, padayon nga nagapangabay ang PRO-6 sa publiko nga magkooperar paagi sa pagtinir sa puluy-an kun wala man lang sang importante nga kadtua.
