Crime of Passion ang ginalantaw nga rasun sa pagluthang-patay sa isa ka mangunguma sa Sitio Bangahon, Barangay Winaswasan, Calatrava, Negros Occidental kahapon sang aga.
Sa interview sang Bombo Radyo Bacolod kay Police Captain Jesus Alba, public information officer sa Calatrava Municipal Police Station, ang biktima ang ginkilala nga si Ryan Ulgasan, 31 anyos, single kag isa ka mangunguma, samtang ang suspetsado ang ginkilala naman nga si Jerson Tabotabo, 30 anyos, laborer, lunsay mga residente sa nasambitan nga lugar.
Sa imbestigasyon, nahibaluan nga may natalana kuntani nga mag-atubangay sa tunga nanday Ulgasan kag Tabotabo matapos nga madakpan sa akto sang suspetsado ang iya live-in partner nga kaupod ang biktima sa sulod sang ila balay.
Apang sang natabo ang insidente, may-ara sang armas luthang si Ulgasan gani wala sang nahimo si Tabotabo kundi ini ang ipadangat na lamang sa barangay agud maareglo.
Apang wala pa mag-abot ang schedule sang ila pag-atubangay, ginsundan sang suspetsado ang biktima samtang ini ang papauli sa uma alas-8:00 sang aga kahapon.
Gilayon sini nga ginluthang ang suspetsado sang makapila ka beses sa nanarisari nga bahin sang iya lawas samtang gilayon naman nga nagpalagyo si Tabotabo.
Gindala pa si Ulgasan sa Calatrava Municipal Hospital apang ini ang gindeklarar nga dead on arrival.
Nakuha naman sa crime scene ang isa ka empty shell sang cal. 45 pistol.
Sa karun padayun ang imbestigasyon sang Calatrava Municipal Police Station sa krimen kag padayun man ang hot pursuit operation sa nagpalagyo nga suspetsado.
