Ginbasura sang Ombudsman ang criminal case nga ginfile batok kay former Cebu Governor Gwendolyn Garcia angot sa desilting project sa Mananga river.
Gindismiss sang Ombudsman ang akusasyon batok kay Garcia sa gina-alegar paglapas sini sa Anti Graft and Corrupt Practices Act ukon Republic Act No. 3019 matapos mag-issue sang special permit para sa desilting operation sa Mananga river bangod sa kakulangan sang probable cause.
Santo sa desisyon sang Ombudsman, wala sang maathag nga circumstantial evidence nga nagapakita sang indi husto nga buluhaton ukon hungod nga paglapas sa layi, gani ang alegasyon nga may tinutuyo nga magdagdag sang administrative, civil, ukon criminal liability ang wala sang legal kag factual basis.
Ang desisyon ang nahuman sang Agosto 29 kag pirmado sang mga miyembro sang Special Panel of Investigators kalakip sanday May DL de Guzman, Corinne Joie Garillo-Arellano, Ryan Silvestre, Mark Angelo Dolo, kag Ryan Medrano.
Naklaro man sa criminal charges si Anthony James Limchesing, tag-iya sang Shalom Construction Inc.
Nahibaluan nga ang nagfile sang complaint amo si Moises Deiparine.
Suno sa iya, nakakomiter sang seryoso nga environmental violations ang Garcia Administration sa paghatag sang Special Permits sa Shalom Construction Inc. sa pagpatigayon sang desilting sa ibabaw nga bahin sang Mananga River
Ginapahayag sini nga nasakop sa proyekto ang mga bahin nga sulod pa sa Central Cebu Protected Landscape (CCPL).
Gintindugan naman sang kampo ni Garcia ang desisyon sa panindugan nga ginhimo ang tikang agud ma-address ang kakulangan sang tubig sa Metro Cebu kadungan sa El Niño phenominon sang 2024.
Gintindugan man sang mga ini nga wala sang nalapas nga environmental laws and regulations.
Luwas diri, may isa pa nga administrative case nga ginapangatubang ang anay gobernador sa Ombudsman, nga una na nga nagmando sa pagbayad ni Garcia sang penalties nga P1.2 million.
Sa karun nagapadayun pa ang hearing sa issue, samtang ang anay gobernador ang nagfile naman sang motion for reconsideration.
