Patay ang isa ka criminology student nga nagasakay sa motorsiklo matapos nabungguan sang pick up truck nga ginamaneho sang isa ka pari sa Barangay Binicuil, Kabankalan City, Negros Occidental.
Suno kay P/Lt Jomel Salarda, deputy chief sang Kabankalan City Police Station, ang biktima ang ginkilala kay Collete Garcia, 21 anyos residente sa Barangay Poblacion, Cauayan kag ini ang backrider sa motorsiklo samtang pilason naman ang driver nga si Regina Grace Valdez, 21 anyos sang Barangay Calubang sa banwa sang Ilog.
Santo sa imbestigasyon sang kapulisan, ang duha ang nagdul-ong sa ila nga classmate gikan sa Barangay Su-ay, Himamaylan City kag magapauli na kuntani, nakasunod naman sa mga ini ang pick-up truck nga ginamaneho ni Fr. Cerelo Andan, 56 anyos, parish priest sa Barangay Tambo, Ayungon, Negros Oriental.
Ginapahayag nga wala matalupangdan sang duha ang nagasunod nga pick-up, samtang madasig naman ang pagpadalagan sang pari sa salakyan.
Ginalantaw ni Salarda ang posibilidad nga tuyo ang pari kag napiyungan bangod nagikan pa ini sa Bacolod City kag magabyahe pabalik sa Negros Oriental kun sa diin wala man sini natalupangdan ang motorsiklo kag nakibot nalang ini sang may naglagapok.
Bangud sa impact sang pagkabunggo, si Garcia ang nakabunggo ang ulo sa hood sang salakyan kag nahulog sa dalan kun sa diin liwat nga nagbunggo ang ulo sini nga gintunaan sang iya nga kamatayon.
Naglabog gikan sa motorsiklo ang driver nga si Valdez samtang ang motorsiklo naman ang gin-arado pa sang pick-up truck sang kapin 200 ka metros.
