Patay ang 20-anyos nga criminoloy student samtang pilason naman ang 53-anyos matapos ginbuno sang nagpugong sa nagamaoy nga hubog sa New Casal-agan, Brgy Antipolo, banwa sang Pontevedra alas-8:43 sang gab-i, Hunyo 22.
Ginkilala ang napatay nga si Charm Molarto, 20-anyos, single, 2nd year BS Criminology student sa La Carlota City College; samtang ang pilason amo si Agustin Aligata, 53-anyos kag kasado.
Samtang, ang 43-anyos nga suspect ang ginkilala nga si Arthur Silva, lalaki, single kag lunsay mga residente sang nasambit nga lugar.
Sa interview sang Bombo Radyo kay Police Captain Darryl Kuhutan, hepe sang Pontevedra Municipal Police Station, ginpunggan sang pamilya kag sa mga katupad balay si Silva bangud ini ang nagamaoy.
Gintambagan ini sang iya bayaw nga si Aligata apang ini ang ginbuno gamit ang patalom kag nakaagom sang pilas sa iya nga kamot.
Suno kay Kuhutan, gintungahaan man sang criminology student nga punggan ang suspect apang siya ang ginbuno man kag naka-agom sang patal nga igo sa idalom sang iya nawala nga ilok.
Ang duha ka biktima ang gilayon nga gindala sa ospital apang si Molarto ang gindekalarar nga dead on arrival.
Suno diri, ang suspect ang nakapalagyo pa matapos ang krimen apang sa bulig sang mga Barangay kag mga pumuluyo natigayon ini nga nadakpan sang mga kapulisan sa Barangay Canroma matapos ang hot pursuit operation.
