Nagpagwa na sang bag-o nga executive order si Bacolod City Mayor Evelio “Bing” Leonardia nga nagatalana sang bag-o nga curfew hours sa ciudad.
Santo sa EO No. 52 series of 2020, nakasaad diri nga sumugod bwas, Agosto 9 tubtob Agosto 22, ang curfew sa Bacolod ang magasugod alas-8:00 sa gab-i tubtob alas-4:00 sa kaagahon.
Exempted naman sa curfew ang mga public emergencies kaangay sang fire ukon ambulance services kag kun may yara sang kalamidad.
Indi man sakop sang amo nga pagsulundan ang mga nagakinahanglan sang medical assistance sakay sa ambulansya ukon pribado kag pampubliko nga salakyan; naga-obra nga night shifts sa mga pribado nga establisyemento; media practitioners kag mga government officials kag employees ukon mga frontliners lakip na ang mga pulis.
Kinahanglan man magpakita sang valid ID nga nagapamatuod nga nalakip sa mga pwede ma-exempt sa curfew.
