Nagpagwa sang executive order no. 82 si Bacolod City Mayor Evelio “Bing” Leonardia natuhoy sa pagsuspende sang curfew sa Desyembre 24 kag Desyembre 31 agud masaulog ang Paskwa kag Bag-ong tuig.
Suno kay Vice Mayor El Cid Familiaran, pinuno sang Inter-Agency Task Force sa Bacolod, ginsuspende ang curfew sa nasambit nga mga petsa agud nga sarang makapamasyar kag makatipon-tipon ang mga pamilya.
Pahanumdom lang ni Familiaran nga tumanon ang social distancing.
Aminado naman ang bise alkalde nga madamo sang nagareunion sa amo nga mga tinion, kalakip na ang pamilya sini.
Ang paglibot naman ang ginahatag na sang ciudad sa mga opisyales sang Barangay.
Apang nagapati si Familiaran nga dapat yara sa kada indibidwal ang responsibilidad bangod indi na makasaway ang mga opisyales kun yara ang mga ini sa sulod sang tagsa ka mga compound sang panimalay.
Paathag ni Familiaran nga nagapabilin gihapon ang COVID-19 sa palibot tubtob sa wala pa sang vaccine gani indi dapat magkumpyansa.
Panugyan naman ni Leonardia nga obserbahan ang minimum health protocol kaangay sang pagsuksok sang facemask, faceshield kag ang paglikaw sa pagtililipon.
Panugyan man sini nga dulaon nalang ang mga buffet sa mga kan-anay, maggamit nalang sang packed lunch ukon magbutang sang manugserbe.
Paandam naman sang bise alkalde ang posibilidad nga maglain nang status sang Bacolod sa Enero matapos ang pagselebrar sang Christmas holiday.
