Ipaidalom subong nga adlaw sa second reading sang Sangguniang Panlungsod sang Bacolod sang curfew ordinance sang ciudad.
Madumduman nga nagpasa sang rekomendasyon si Mayor Evelio “Bing” Leonardia nahanungod sa pagpatemprano sang oras sang curfew sa alas 8:00 sang gab-i tubtob alas 4:00 sang kaagahon.
Sa interview sang Bombo Radyo kay Councilor Archie Baribar, pinuno sang Comittee on Laws and Ordinances sa SP, ginpahayag sini nga magapatigayon sila sang committee hearing subong nga adlaw nahanungod sa curfew ordinance.
Suno kay Baribar, ila ikonsiderar ang opinyon sang alkalde subong man ang panindugan sang business sector.
Gindugang man sini nga kun kinahanglanon gid, posible nga ila suspendihon ang rule kag magaproceed na sa third and final reading.
Samtang nagpadala naman sang sulat ang grupo sang mga negosyante sa Bacolod City kag Negros Occidental kay Mayor Evelio “Bing” Leonardia nga irekonsiderar ang pagkambyo sang oras sang curfew.
Ang nasambit nga sulat ang ginpadala sang mga pinuno sang Metro Bacolod Chamber of Commerce and Industry (MBCCI); Bacolod Filipino-Chinese Chamber of Commerce and Industry; Negros Occidental-Filipino Chinese Amity Club, Inc.; Northern Negros Filipino-Chinese Chamber of Commerce and Industry; kag Southern Negros Filipino-Chinese Chamber of Commerce and Industry.
Naga-apelar ang mga ini sa alkalde nga ipabilin sa alas 10:00 sang gab-i tubtob alas 4:00 sang kaagahon ang curfew bangud wala pa nakabawi ang ekonomiya sang ciudad kag probinsya sa halit nga tuga sang coronavirus pandemic.
Suno sa grupo, dako nga bulig ang dugang nga lima ka oras pagkatapos sang normal working hours para makabawi-bawi ang sektor sang negosyo.
Suno sa ila, kun himuon alas 8:00 sang gab-i ang sugod sang curfew, magapatimaan sang mas malip-ot nga business hours kag 40% nga mabuhin sa ila nga revenues.
Gindugang man sang grupo nga madamo nga mga negosyo ang posible nga magsira kag mga empleyado nga madulaan sang ubra.
Nagcommit man ang mga ini nga kun ipabilin sa alas 10:00 sang gab-i ang curfew, magakooperar gid ang mga negosyante sa minimum standard and health protocols sang ciudad.
