Epektibo na karun sa gab-i ang curfew nga ipatuman sa banwa sang La Castellana, Negros Occidental kasunod sang pag-evacuate sang mga residente bangud sa paglupok sang Bulkan Kanlaon sang Lunes sang gab-i nga ginsundan ang pag-ilig sang lahar sang Miyerkules sang hapon.
Suno kay La Castellana Mayor Rhummyla Nicor-Mangilimutan, nagpa gwa ini sang Executive Order No. 024-026 nga magapatuman sang municipal curfew humalin sang alas 9:00 ang takna karun sa gab-i tubtob alas 4:00 ang takna sa kaagahon bangud sa Mt. Kanlaon eruption.
Suno kay Mangilimutan, nagapabilin sa Alert Level 2 ang Bulkan Kanlaon kag padayon man ang ila nga monitoring sa lahar sa pila ka mga barangay.
Bangud sini kinahanglan nga iregulate ang public kag non-essential activities sa ila nga banwa agud nga masiguro ang safety sang mga residente kag maminimize ang kriminalidad.
Suno sa local chief executive, ipatuman ang curfew sa mga indibidwal sa tanan nga pampubliko nga lugar humalin alas -9:00 ang takna sa gab-i tubtob alas-4:00 ang takna sang kaagahon, magluwas na lamang sa mga empleyado sang gobyerno nga on duty sa sulod sang curfew hours, sa tanan nga mga empleyado sa pribado nga sektor nga pasulod ukon manugpauli pa lang sa nasambit nga oras, mga medical doctors kag veterinarians nga kinahanglan magduty, mga empleyado sa public utility companies nga nagapatigayon sang construction, maintenance kag emergency activities; kag tanan nga may medical, emergency kag disaster case.
Ang order sa curfew ang epektibo subong nga adlaw, Hunyo 7, tubtob nga marevoke sang alkalde ang executive order.
