Ginbasura sang Department of Justice (DOJ) ang cyberlibel complaint nga gin-file ni Senator Risa Hontiveros batok sa isa ka abogado kag lima ka social media personalities nga ginaalegar nagpalapta sang alegasyon nga gin-impluwensyahan niya ang lalaki agud magtestigo batok kay former President Rodrigo Duterte kag iban pa.
Sa 26 ka panid nga resolusyon, wala sang nakita nga prima facie evidence with reasonable certainty of conviction ang panel of prosecutors agud i-indict ang abogado nga si Ferdinand Topacio kag sanday Bryon Cristobal ukon Banat By, Jeffrey “Ka Eric” Celiz, Krizette “Kiffy” Chu, Jose “Jay” Sonza, kag Alex Destor ukon Tio Moreno.
Sang nagligad nga tuig, gin-alegar ni Michael Maurillo nga ginpilit sia ni Hontiveros agud maghambal batok kanday Ex-Pres. Duterte,Vice President Sara Duterte, kag detained pastor Apollo Quiboloy.
Ginpanginwala naman sang Senadora ang amo nga akusasyon.
