Naghatag na sang instruction ang Department of Agriculture Central Office sa regional offices nga ihanda ang listahan sang mga corn farmers nga kwalipikado nga magbaton sang fuel subsidy kadungan sang padayon nga pagsaka sang presyo sang diesel kag gasolina.
Sa interview sang Bombo Radyo kay DA Region 6 director Remelyn Recoter, ginahulat pa subong nga madownload ang pondo sa Development Bank of the Philippines bangud indi cash ang ihatag kundi fuel discount card nga nagabalor P3,000 kada corn farmer.
Suno kay Recoter, ang una nga batch nga makabaton amo ang DA-assisted cooperatives.
Sila ang required nga magsumiter sang proof of ownership apang mahapos nalang sini sa DA official bangud kun DA-assisted, yara na ang Deed of Donation kag Memorandum of Agreement sa makinarya nga ginhatag sa asosasyon.
Suno kay Recoter, indi tanan nga miyembro sang asosasyon ang makabaton bangud ang nag-avail lang sang serbisyo sang makinarya ang hatagan sang voucher.
Bangud sini, kinahanglan nila nga magpresentar sang resibo nagikan sa asosasyon nga nag-arkila ang miyembro sang makinarya kaangay sang traktora ukon corn sheller, samtang ang wala nagrenta sang makinarya ang indi maka-avail sang fuel discount card.
Kadungan sini, nagpanugyan si Recoter sa mga mangunguma nga maghulat-hulat lang bangud ginahulat pa nga madownload ang pondo sa DBP kag makahatag sang accreditation sa fuel stations nga luyag magpartisipar sa programa.
